Señol jues, pasi usté más alanti

y que entrin tos ésus,

no le dé a usté ansia,

no le dé a usté mieu...

Si venís antiyel a afligila,

sos tumbo a la puerta. ¡Pero ya s'a muertu.

¡Embargal, embargal los avíus,

que aquí no hay dineru:

lo he gastau en comías pa ella

y en boticas que no le sirvierun;

y esu que me quea,

porque no me dio tiempu a vendellu,

ya me está sobrandu,

ya me está gediendu!

Embargal ese sachu de picu

y esas jocis clavás en el techu,

y esa segureja

y esi cachu e liendru...

¡Jerramientas, que no quedi una!

¿Yo pa qué las quieru?

Si tuviá que ganalu pa ella,

¡qualisquiá me quitaba a mí esu!

Peru ya no quió vel esi sachu,

ni esas jocis clavás en el techu,

ni esa segureja,

ni ese cachu e liendru...

¡Pero a vel, señol jues: cuidiaitu

si algunu de ésus

es osau de tocali a esa cama

ondi ella s'a muertu;

la camita ondi yo la he queríu

cuando dambus estábamos güenus,

la camita ondi yo la he cuidiau,

la camita ondi estuvo su cuerpu

cuatro mesis vivu

y una noche muertu!...

¡Señol jues: que nengunu sea osau

de tocali a esa cama ni un pelu,

porque aquí lo jincu

delante usté mesmu!

Lleváisoslu todo,

todu, menos esu,

que esas mantas tienin

suol de su cuerpu...

¡y me güelin, me güelin a ella

ca ves que las güelu!...